ពិធី​សម្ពោធ​ជា​ផ្លូវ​ការ​អគារ​ថ្មី​នៃ​ធនាគារ ស្ថាបនា សាខា​ខេត្តកែប

រាជធានីភ្នំពេញ, ថ្ងៃទី១៥ ខែមិថុនា ឆ្នាំ២០២០ - ធនាគារ ស្ថាបនា បាន​សម្ពោធ​ជា​ផ្លូវ​ការ​អគារ​ស្តង់​ដា​ថ្មី​នៃ​សាខា ខេត្តកែប ដែល​ត្រូវ​បាន​ផ្លាស់​ប្តូរ​មក​ទី​តាំង​ថ្មី ដែល​ល្អ​និង​ធំ​ទូ​លាយ​ជាង​មុន។ នេះ​ជា​ការ​ស​បញ្ជាក់​អំពី​ការ​រីក​ចម្រើន​ជា​លំដាប់​របស់​ធនាគារ ក្នុង​នាម​ជា​ធនាគារ​ពាណិជ្ជ ដែល​មាន​បណ្តាញ​សាខា​ធំ​ជាង​គេ​ទី២ ក្នុង​ព្រះ​រាជា​ណា​ចក្រ​កម្ពុជា​។

លោក លឹម អូន ប្រធាន​នាយក​ប្រតិបត្តិ​នៃ​ធនាគារ ស្ថាបនា បាន​លើក​ឡើង​ថា៖ “ដោយ​សារ​ការ​សង្កេត​ឃើញ​នូវ​ការ​កើន​ឡើង​នៃ​តម្រូវ​ការ​របស់​អតិថិជន ក្នុង​ខេត្ត​កែប ធនាគារ​ក៏​បាន​សម្រេច​ចិត្ត​ផ្តល់​ជូន​អតិថិជន​នូវ​អគារ​ថ្មី​នេះ ដែល​បម្រើ​ជូន​សេវា​ធនាគារ​ពេញ​លេញ។ សាខា ខេត្តកែប ត្រូវ​បាន​រចនា តុបតែង និង​បំពាក់​ឧបករណ៍​ទំនើបៗ ទៅ​តាម​ស្តង់​ដា​អគារ​ថ្មី​របស់​ធនាគារ ដើម្បី​ផ្តល់​ជូន​អតិថិជន​នូវ​ភាព​ងាយ​ស្រួល សេវា​រហ័ស​ទាន់​ចិត្ត និង​សុវត្ថិភាព។”

លោក​បាន​បន្ថែម​ទៀត​ថា៖ “ទោះ​បី​បច្ចុប្បន្ន យើង​មាន​រហូត​ដល់ ១៧១ សាខា​នៅ​ទូ​ទាំង​ប្រទេស​ក្តី ចំនួន​អតិថិជន និង​តម្រូវ​ការ​របស់​អតិថិជន​តែង​តែ​កើន​ឡើង​ពី​មួយ​ឆ្នាំ​ទៅ​មួយ​ឆ្នាំ ដែល​ទាម​ទារ​ឲ្យ​ធនាគារ​បន្ត​វិនិយោគ​លើ​បណ្តាញ និង​សមត្ថភាព​របស់​ខ្លួន ទាំង​ហេដ្ឋា​រចនា​សម្ព័ន្ធ​ធនាគារ​រូប​វន្ត ទាំង​ប្រព័ន្ធ​ធនាគារ​ឌីជីថល ដើម្បី​ឈរ​នៅ​ជួរ​មុខ​នៃ​ការ​ផ្លាស់​ប្តូរ និង​ឆាក​ប្រកួត​ប្រជែង។”

ធនាគារ ស្ថាបនា សាខា​ខេត្តកែប  ត្រូវ​បាន​តំឡើង​ពី​សាខា​ប្រភេទ “ខ” មក​ជា​សាខា​ប្រភេទ “ក”   ដើម្បី​ផ្តល់​ជូន​អតិថិជន​នូវ​សេវា​ធនាគារ​ពេញ​លេញ​រួម​មាន សេវាឥណទាន សេវាបញ្ញើ សេវា​iBanking ប្រព័ន្ធ​ធនាគារ​តាម​ទូរស័ព្ទដៃ ប័ណ្ណ​ឥណពន្ធ​និង​ឥណទាន សេវា​ផ្ទេរ​ប្រាក់​ក្នុង​និង​ក្រៅ​ប្រទេស Western Union ហិរញ្ញ​វត្ថុ​ពាណិជ្ជកម្ម និង​សេវា​ផ្សេងៗ​ទៀត​ជា​ច្រើន ព្រម​ទាំង​មាន​ទូអេធីអឹម​ដក​ប្រាក់ ដាក់ប្រាក់។

សាខា ខេត្តកែប ស្ថិត​នៅ​លើ​បណ្តោយ​ផ្លូវ​ជាតិ​លេខ ៣៣ ភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប (ខាង​ត្បូង​ផ្សារ​ដំណាក់​ចង្អើរ ប្រហែល ១០០ម៉ែត្រ)។ សម្រាប់​ព័ត៌មាន​បន្ថែម​សូម​ទាក់​ទង​លេខ៖ ០២៣/០៨១ ៩៩៩ ០១០!

អំពីធនាគារ ស្ថាបនា
ធនាគារ ស្ថាបនា ជា​ធនាគារ​ពាណិជ្ជ​ឈាន​មុខ​គេ​មួយ​ក្នុង​ព្រះ​រាជា​ណាចក្រ​កម្ពុជា ដែល​មាន​ទ្រព្យ​សកម្ម​សរុប​លើស ១,៨ ពាន់​លាន​ដុល្លារ​អាមេរិក និង​មាន​បុគ្គលិក​ច្រើន​ជាង ៤.០០០នាក់។ ធនាគារ​មាន​បណ្តាញ​សាខា​ច្រើន​បំផុត​ទី២ ជា​មួយ​នឹង​ចំនួន​សាខា​ច្រើន​ជាង ១៧០ទីតាំង  និង​អេធីអឹម​ជាង ២២០កន្លែង ដែល​មាន​សមត្ថភាព​ពេញ​លេញ​ដូច​ជា​ដាក់​ប្រាក់ ដកប្រាក់ និង​ធ្វើ​ការ​ទូ​ទាត់​ប្រាក់។ ធនាគារ​ផ្តល់​ជូន​អតិថិជន​នូវ​សេវាកម្ម​ធនាគារ​ពេញ​លេញ រួម​មាន សេវាឥណទាន សេវាបញ្ញើ iBanking ប្រព័ន្ធ​ធនាគារ​តាម​ទូរស័ព្ទ​ដៃ ប័ណ្ណ​ឥណពន្ធ​និង​ឥណទាន សេវា​ផ្ទេរ​ប្រាក់​ក្នុង និង​ក្រៅ​ប្រទេស Western Union ហិរញ្ញវត្ថុ​ពាណិជ្ជកម្ម និង​សេវា​ផ្សេងៗ​ទៀត​ជា​ច្រើន។ លើស​ពី​នេះ ធនាគារ​ក៏​បាន​ធ្វើ​ការ​សហការ​ជា​មួយ​ក្រុម​ហ៊ុន​ផ្ទេរ​និង​ទូទាត់​ប្រាក់ តាមរយៈទូរស័ព្ទ រួម​មាន​ដូច​ជា វីង ផាយផេ ទ្រូម៉ាន់នី លីហួរវេលុយ អ៊ី-ម៉ាន់នី និងបាគង ដើម្បីផ្តល់នូវភាពងាយស្រួលដល់អតិថិជន។

Makes Your Life Better