ពិធី​សម្ពោធ​ជាផ្លូវ​ការ​អគារ​ថ្មី​នៃ​ធនាគារ​ ស្ថាបនា សាខា​ខេត្ត​រតនគិរី​

ភ្នំពេញ ​ថ្ងៃ​ទី​០៦​ ខែ​កញ្ញា​ ឆ្នាំ​២០១៩​ - ថ្ងៃ​នេះ​ធនាគា​រ ស្ថាបនា​ បាន​ប្រារព្ធ​កាត់​ខ្សែ​បូ​ដើម្បី​សម្ពោធ​ជា​ផ្លូវ​ការ​នូវ​អគារ​ថ្មី​ សាខា​ខេត្ត​រតនគិរី។ នេះ​​ក៏​ជា​ការ​បង្ហាញ​កេរ្តិ៍​ឈ្មោះ​ថ្មី​នៃ​ធនាគារ​ ស្ថាបនា​ ខណៈ​បណ្តាញ​សាខា​នៅ​តែ​បន្ត​ពង្រីក​ឥត​ឈប់​ឈរ​នាពេល​អនាគត។

លោក​ លឹម អូន ប្រធាន​នាយក​ប្រតិបត្តិ​ធនាគារ​ ស្ថាបនា បានប្រសាសន៍​ថា៖ “កន្លង​មក​យើង​ខ្ញុំ​បាន​រក​ឃើញ​នូវ​សក្តានុពល​ទីផ្សារ​ខេត្ត​រតនគិរី​ដែល​មាន​សកម្មភាព​សេដ្ឋកិច្ច​ល្អ​មាន​តំរូវ​ការ​សេវា​ហិរញ្ញវត្ថុ​ខ្ពស់​ហើយ​ក៏​បាន​បើក​ការិយាល័យ​ប្រតិបត្តិការ​នៅ​ទី​នេះ​រហូត​ដល់​០៥​សាខា​ដែល​ក្នុង​នោះ​គឺ​មាន​សាខា​មួយ​នៅ​ទី​រួម​ខេត្ត​ដែល​យើង​កំពុង​ប្រកាស​ដាក់​ឲ្យ​ដំណើរ​ការ​ជា​ផ្លូវការ​នា​ពេល​នេះ។ ជា​មួយ​នឹង​ការ​រៀប​ចំ​អគារ​ការិយាល័យ​ថ្មី​ដែល​មាន​ការ​រចនា​ការ​តុប​តែង​ និង​ការ​បំពាក់​ឧបករណ៍​ទំនើប​ៗ​ទៅ​តាម​ស្តង់ដារ​សាខា​ធនាគារ​ពេញ​លេញ​ ប្រកប​ដោយ​ភាព​ងាយ​ស្រួល​ស្អាត​ហើយ​មាន​សុវត្ថិភាព​ខ្ពស់​ទាំង​នេះ​គឹ​ជា​ការ​ឆ្លុះ​បញ្ជាំង​នូវ​ការ​តាំង​ចិត្ត​ខ្ពស់​របស់​ធនាគារ ស្ថាបនា ក្នុង​ការ​ធ្វើ​ទំនើប​កម្ម​ធនាគារ ស្ថាបនា ឈាន​ទៅ​ដល់​ការ​ឈរ​ជើង​កាន់​តែ​រឹង​មាំ​នាំ​មក​នូវ​សេវាកម្ម​កាន់​តែ​ប្រសើរ និង​វឌ្ឍន​ភាព​សម្រាប់​អតិថិជន​គ្រប់រូប។ យើង​ខ្ញុំ​សង្ឃឹម​ថា លោក​/​លោក​ស្រី​នឹង​ផ្តល់​ការ​គាំទ្រ​បន្ថែម​ដល់​ធនាគារ ស្ថាបនា សាខា​ខេត្ត​រតនគិរី​ ហើយ​គ្រប់​បុគ្គលិក​នៅ​ទី​នេះ​ក៏​បាន​ប្តេជ្ញា​ចិត្ត​ខ្ពស់​ដើម្បី​បំរើ​លោក​អ្នក​ឲ្យ​កាន់​តែ​ល្អ​ប្រសើរ”។

ចំណែក​លោក ជិន ជីវ័ន ប្រធាន​នាយកធនាគារ​ ស្ថាបនា​ សាខា​ខេត្តរតនគិរី​ បាន​ប្រកាស​ថា​ «ដើម្បី​អបអរសាទរ​ដល់​ពិធី​សម្ពោធ​អគារ​ថ្មី​នៃ​សាខា​ខេត្ត​រតនគិរី​នេះ​ អតិថិជន​នៅ​តំបន់​នេះ​មាន​ឱកាស​ទទួល​បាន​កាដូ​ដូច​ជា​ ឆ័ត្រ​ កែវ​ទឹក​ ឬ​កាបូប​កីឡា​ នៅ​ពេល​ពួក​គាត់​បើក​គណនី​ថ្មី។ ការ​ផ្តល់​ជូន​នេះ​ចាប់​ពី​ថ្ងៃ​ប្រកាស​នេះ​រហូត​ដល់​អស់​ពី​ស្តុក»។

ធនាគារ​ ស្ថាបនា​ សាខា​ខេត្តរតនគិរី​មាន​ម៉ាស៊ីន​អេធីអឹម​ដក​ប្រាក់​ ម៉ាស៊ីន​ដាក់​ប្រាក់​ និង​ធ្វើ​ការ​ទូទាត់​ប្រាក់​ដែល​អាច​ប្រតិបត្តិការ​២៤​ម៉ោង​ ពេញ​មួយ​សប្តាហ៍។

នា​​ពេល​​ខាង​មុខ​ ធនាគារ​ ស្ថាបនា​ នឹង​នៅ​តែ​បន្ត​ពង្រីក​បណ្តាញ​សាខា​របស់​ខ្លួន​បន្ថែម​ទៀត​ និង​បង្កើត​វត្តមាន​របស់​ខ្លួន​ដ៏​រឹង​មាំ​នៅ​តំបន់​ដែល​អតិថិជន​ត្រូវ​ការ​បំផុត។

អំពីធនាគារ​ ស្ថាបនា
ធនាគារ​ ស្ថាបនា​ គឺ​ជា​ធនាគារ​រពាណិជ្ជ​ឈាន​មុខ​គេ​មួយ​នៅ​ក្នុង​ប្រទេស​កម្ពុជា​ដែល​មាន​ទ្រព្យ​សកម្ម​សរុប​លើស​ ១.៣​ ពាន់​លាន​ដុល្លារ​អាមេរិក​ និង​មាន​បុគ្គលិក​បម្រើ​ការងារ​ច្រើន​ជាង ​៤០០០នាក់។ យើង​មាន​បណ្តាញ​សាខា​ធំ​ជាង​គេ​ទី​ពីរ​នៅ​ក្នុង​ប្រទេស​កម្ពុជា​ដែល​មាន​សាខា​ចំនួន​ ១៧១​សាខា​ និង​ ម៉ាស៊ីន​ អេធីអឹម​ ចំនួន​១៦១​គ្រឿង​ ដែល​មាន​សមត្ថភាព​ពេញ​លេញ​ដូច​ជា​ដាក់​ប្រាក់​ ដក​ប្រាក់​ និង​ធ្វើ​ការ​ទូទាត់​ប្រាក់។ យើង​ផ្ដល់​សេវាកម្ម​ធនាគារ​ពេញ​លេញ​ដូច​ជា​សេវា​ប្រាក់​កម្ចី​ សេវា​ប្រាក់​បញ្ញើ​ សេវា​ iBanking​សេវា​ធនាគារ​តាមទូរស័ព្ទដៃ​ សេវាប័ណ្ណ​ឥណពន្ធ​ និង​ប័ណ្ណ​ឥណទាន​ប្រភេទ​វីសា​ សេវា​ផ្ទេរ​ប្រាក់​ក្នុង​ស្រុក​និង​ក្រៅ​ប្រទេស​ សេវា​ផ្ទេរ​ប្រាក់​ជុំ​វិញ​ពិភព​លោក​ Western​ Union ហិរញ្ញវត្ថុ​ពាណិជ្ជកម្ម​ និង​សេវា​កម្ម​ផ្សេង​ៗទៀ​ត​ជា​ច្រើន​។ ជា​មួយ​គ្នា​នោះ​ផង​ដែរ​ យើង​បាន​សហការ​ជា​មួយ​ក្រុម​ហ៊ុន​ទូទាត់​តាម​ទូរស័ព្ទ​ដៃ​ជា​ច្រើន​ដូច​ជា​ វីង​ ផាយផេ​ ទ្រូម៉ាន់នី​ និង​ លី​ ហួរ វេរលុយ​ ដើម្បី​ផ្តល់​ភាព​ងាយ​ស្រួល​ដល់​អតិថិជន។