ជំហរ​របស់​ធនាគារ​ ស្ថាបនា​ ចំពោះ​ការ​ការពារ​អតិថិជន​

រាជ​ធានីភ្នំពេញ​ ថ្ងៃ​ទី​០៩​ ខែ​សីហា​ ឆ្នាំ​២០១៩​_​ ធនាគារ​ ស្ថាបនា​ ភីអិលស៊ី​ (“ធនាគារ​ ស្ថាបនា”)​ សូម​គាំទ្រ​ចំពោះ​ការ​លើក​ឡើង​របស់​សមាគម​មីក្រូហិរញ្ញ​វត្ថុ​កម្ពុជា​(CMA)​​ ទាក់ទង​នឹង​របាយការណ៍​របស់​អង្គការ​ LICADHO និង​សមាគម​ធាងត្នោត (STT)​ ស្ដី​អំពី​ “ការ​ធ្វើ​ឲ្យ​ខូចខាត​ទ្រព្យ​បញ្ចាំ​(Collateral​ Damage)”​ ដែល​បាន​ចេញ​ផ្សាយ​នៅ​ថ្ងៃ​ទី​ ០៧ ​ខែ​សីហា​ ឆ្នាំ​២០១៩ (“របាយការណ៍”)​ ដែល​របាយការណ៍​នេះ​ មិន​បាន​ឆ្លុះ​បញ្ចាំង​ឲ្យ​ឃើញ​ពី​ស្ថានភាព​​ហិរញ្ញវត្ថុ​​នា​ពេល​បច្ចុប្បន្ន​របស់​ប្រទេស​កម្ពុជា​ និង​ព្រម​ទាំង​មាន​ចេតនា​លាបពណ៌​ និង​បង្ហាញ​នូវ​រូប​ភាព​អវិជ្ជមាន​ ដែល​មិន​មាន​ភាព​ប្រាកដ​និយម​ចំពោះ​ការ​ផ្តល់​កម្ចី​ពី​សំណាក់​គ្រឹះ​ស្ថាន​មីក្រូ​ហិរញ្ញ​វត្ថុ​ ក្នុង​ខណៈ​ដែល​ប្រភព​ទិន្នន័យ​ទាំង​នោះ​ បាន​ដក​ស្រង់​ចេញ​ពី​ករណី​សិក្សា​នៃ​កម្ចី​ចំនួន​២៨​ ក្នុង​ចំណោម​អ្នក​ខ្ចីប្រាក់​ ច្រើន​ជាង​២​លាន​នាក់​ យោង​លើ​សេចក្ដី​ប្រកាស​ព័ត៌មាន​របស់​ CMA​ ចុះ​ថ្ងៃ​ទី​០៧​ ខែ​សីហា​ ឆ្នាំ​២០១៩។

ធនាគារ​ ស្ថាបនា​ គឺ​ជា​ធនាគារ​ពាណិជ្ជ​ដែល​ទទួល​បាន​អាជ្ញា​ប័ណ្ណ​ត្រឹម​ត្រូវ​តាម​ច្បាប់​  និង​តែង​តែ​យក​ចិត្ត​ទុក​ដាក់​ចំពោះ​ការ​អនុវត្ត​វិធាន​ និង​បទ​បញ្ញត្តិ​ជា​ធរមាន​ដែល​ជា​ត្រី​វិស័យ​ រួម​នឹង​ការ​គោរព​យ៉ាង​ម៉ឺង​ម៉ាត់​នូវ​គោល​ជំហរ​ការ​​ការពារ​អតិថិ​ជន​របស់​ខ្លួន​ ដែល​ជា​គោលការណ៍​មួយ​ក្នុង​ចំណោម​គោលការណ៍​ស្នូល​   របស់​ធនាគារ​ ស្ថាបនា។

ធនាគារ​ ស្ថាបនា​ បាន​កសាង​កិត្តិនាម​របស់​ខ្លួន​ចាប់​តាំង​ពី​ឆ្នាំ​១៩៩៥​ តាម​រយៈ​ការ​ផ្តល់​សេវាកម្ម​ដ៏​ល្អ​ និង​ការ​ទទួល​បាន​ទំនុក​ចិត្ត​ពី​អតិថិ​ជន​ ដែល​រួម​មាន​ទាំង​វិនិយោគិន​ក្នុង​ស្រុក​ និង​ក្រៅ​ស្រុក​ ដែល​ជា​អ្នក​ផ្តល់​ហិរញ្ញប្បទាន​របស់​ពួក​យើង​ ក៏​ដូច​ជា​អតិថិ​ជន​ដាក់​ប្រាក់​បញ្ញើ​ និង​/​ឬ​ទទួល​ប្រាក់​កម្ចី។

ធនាគារ​​ ស្ថាបនា​​ មាន​ការ​សោក​ស្ដាយ​ចំពោះ​ព័ត៌មាន​នេះ​ និង​ច្រាន​ចោល​រាល់​ការ​ចោទ​ប្រកាន់​ដូច​ដែល​បាន​រៀប​រាប់​ក្នុង​របាយការណ៍​របស់​អង្គការ LICADHO​ និង​សមាគម​ធាងត្នោត (STT)​ ដែល​បាន​ដាក់​ បញ្ចូល​ធនាគារ​ ស្ថាបនា​ ជា​ផ្នែក​មួយ​នៃ​ការ​រំលោភ​បំពាន​សិទ្ធិ​មនុស្ស​យ៉ាង​ធ្ងន់​ធ្ងរ​ ដែល​កើត​ចេញ​ពី​ បំណុល​វ័ណ្ឌក​របស់​គ្រឹះ​ស្ថាន​មីក្រូហិរញ្ញវត្ថុ។

ឆ្លៀត​ឱកាស​នេះ​ ធនាគារ​ ស្ថាបនា​ សូមជម្រាប​ជូន​ សាធារណៈ​មេត្តា​ជ្រាប​ថា​ គណៈ​គ្រប់​គ្រង​របស់​ធនាគារ​ ស្ថាបនា​ តែង​តែ​កើន​រំលឹក​ និង​ផ្ញើ​សារ​ដល់​ និយោជិក​របស់​ខ្លួន​ ជា​ពិសេស​ចំពោះ​មន្រ្តី​ឥណទាន​ ត្រូវ​បំពេញ​ការងារ​ប្រកប​ដោយ​វិជ្ជាជីវៈ ​និង​ការ​ ទទួល​ខុស​ត្រូវ​ខ្ពស់​ ហើយ​ធនាគារ​ ស្ថាបនា​ នឹង​អនុវត្ត​បទ​វិន័យ​ដោយ​គ្មាន​ការ​យោគយល់​ចំពោះ​ការ​ ប្រព្រឹត្ត​កំហុស​ធ្ងន់​ធ្ងរ​ និង​ឥរិយាបទ​ខុស​ឆ្គង​ណា​មួយ​ ដែល​បាន​​ប្រព្រឹត្តដោយ​បុគ្គលិក​ណា​មួយ​របស់​ ធនាគារ ស្ថាបនា។ ក្នុង​បរិបទ​នេះ​ ធនាគារ​ ស្ថាបនា​ នឹង​ចាត់​វិធាន​ការ​តឹង​រ៉ឹង​ និង​ធ្វើ​កិច្ច​សហប្រតិបត្តិការ​យ៉ាង​ជិត​ស្និទ្ធ​ជា​មួយ​ដៃ​គូ​ពាក់​ព័ន្ធ​ ដើម្បី​ពិនិត្យ​ទៅ​លើ​ករណី​សិក្សា​ដែល​បាន​លើក​ឡើង​នៅ​ក្នុង​របាយការណ៍​នេះ។

ជា​ចុង​ក្រោយ​ បើ​ទោះ​បី​ជា​ធនាគារ​ ស្ថាបនា​ មាន​ការ​សោក​ស្តាយ​ជុំ​វិញ​របាយការណ៍​នេះ​ក៏​ដោយ​ក្តី​ ក៏​របាយការណ៍​នេះ​នឹង​មិន​មាន​ឥទ្ធិពល​ណា​មួយ​ចំពោះ​ធនាគារ​ ស្ថាបនា​ ដែល​ជា​ធនាគារ​មួយ​ក្នុង​ចំណោម​ ​ធនាគារ​ដែល​ទទួល​បាន​ការ​គាំទ្រ​ពី​សំណាក់​អតិថិ​ជន​ ដើម្បី​បន្ដ​ចូល​រួម​ និង​ធ្វើ​វិភាគ​ទាន​កាត់​បន្ថយ​ភាព​ ក្រីក្រ​ ក៏​ដូច​ជា​លើក​តម្កើន​បរិយាប័ន្ន​ហិរញ្ញ​វត្ថុ​ក្នុង​ប្រទេស​កម្ពុជា៕