ក្រុមហ៊ុន មេនូឡាយហ្វ៍ និងធនាគារ ស្ថាបនា សហការគ្នាដើម្បីផ្តល់ជូនអតិថិជននូវជម្រើសក្នុងការបង់បុព្វលាភរ៉ាប់រងតាមទូរស័ព្ទ

រាជធានីភ្នំពេញ, ថ្ងៃទី ៣០ ខែមករា ឆ្នាំ 2019  – ក្រុម​ហ៊ុន មេនូឡាយហ្វ៍ ខេមបូឌា ដែល​ជា​ក្រុម​ហ៊ុន​ធានា​រ៉ាប់​រង​អាយុ​ជីវិត​អន្តរ​ជាតិ​ដំបូង​បំផុត​នៅ​ក្នុង​កម្ពុជា និង​ធនាគារ ស្ថាបនា ដែល​ជា​ធនាគារ​ឈាន​មុខ​គេ​មួយ ធ្វើ​ការ​ប្រកាស​ជា​ផ្លូវ​ការ​ពី​ភាព​ជា​ ដៃ​គូ​ក្នុង​ការ​បង់​បុព្វ​លាភ​រ៉ាប់​រង​តាម​ទូរស័ព្ទ​ដែល​អនុញ្ញាត​ឱ្យ​អតិថិជន​របស់​ក្រុម​ហ៊ុន មេនូឡាយហ្វ៍ បង់​បុព្វ​លាភ​រ៉ាប់រង​របស់​ពួក​គាត់​ គ្រប់​ពេល​ដោយ​ឥត​គិត​ថ្លៃ​តាម​រយៈ​កម្ម​វិធី​ទូរ​ស័ព្ទ Sathapana Mobile។
ក្រុមហ៊ុន មេនូឡាយហ្វ៍ និងធនាគារ ស្ថាបនា បាន​ចាប់​ជា​ដៃ​គូ​ក្នុង​ការ​ចែក​ចាយ​ផលិត​ផល​ធានា​រ៉ាប់​រង​អាយុ​ជីវិត កាល​ពី​ឆ្នាំ ២០១៨ ហើយ​កិច្ចសហ​ការ​ដែល​ប្រកាស​ថ្ងៃ​នេះ​នឹង​អនុញ្ញាត​ឱ្យ​អតិថិជន​ធ្វើ​ការ​ទូ​ទាត់​បុព្វ​លាភ​រ៉ាប់រង​បាន​កាន់​តែ​ឆាប់​រហ័ស ងាយ​ស្រួល​ និង​មាន​សុវត្ថិភាព​ដោយ​ធ្វើ​តាម​ជំហាន​ងាយៗ​ដូច​ខាង​ក្រោម៖
1.    បើក​ដំណើរ​ការ​កម្ម​វិធី Sathapana Mobile
2.    ចុច​យក​ប៊ូតុង «ទូ​ទាត់​វិក្កយបត្រ»
3.    ជ្រើសរើសយកពាក្យ «ធានារ៉ាប់រង»
4.    ជ្រើស​រើស​យក «Manulife Cambodia»
5.    វាយ​បញ្ចូល «លេខ​ស្នើ​សុំ​ប័ណ្ណ​សន្យា​រ៉ាប់រង ឬ​លេខ​ប័ណ្ណ​សន្យា​រ៉ាប់រង» របស់​លោក​អ្នក​
6.    ជ្រើស​រើស​គណនី ដែល​លោក​អ្នក​ត្រូវ​បង់
7.    ចុច​យក​ពាក្យ «បន្ទាប់» ហើយ​បញ្ចូល​លេខ​សម្ងាត់ Sathapana Mobile របស់​លោក​ រួច​ចុច​លើ​ប៊ូ​តុង «ទូទាត់» អ្នក​ជា​ការ​ស្រេច។


លោក Robert Elliott អគ្គ​នាយក​ប្រតិបត្តិ និង​នាយក​ចាត់​ការ​ទូ​ទៅ​នៃ​ក្រុម​ហ៊ុន មេនូឡាយហ្វ៍ ខេម​បូឌា មាន​ប្រសាសន៍​ថា៖ «ចំណុច​ជា​អាទិភាព​មួយ​របស់​ក្រុម​ហ៊ុន មេនូឡាយហ្វ៍ គឺ​ការ​ធ្វើ​ឲ្យ​បទ​ពិសោធន៍​អតិថិជន​កាន់​តែ​ល្អ​ប្រសើរ​តាម​រយៈ​បច្ចេក​វិជ្ជា​ឌីជីថល ហើយ​សមិទ្ធផល​ដែល​យើង​កំពុង​ប្រកាស​ជា​មួយ​ធនាគារ ស្ថាបនា ថ្ងៃ​នេះ​ដើរ​ស្រប​គ្នា​យ៉ាង​ល្អ​ឥត​ខ្ចោះ​ទៅ​នឹង​ចក្ខុវិស័យ​របស់​យើង។ ខ្ញុំ​ពិត​ជា​មាន​មោទន​ភាព​ណាស់​ដែល​យើង​អាច​អភិវឌ្ឍន៍​លើ​ភាព​ជា​ដៃ​គូ​ចែក​ចាយ​ផលិត​ផល​ធានា​រ៉ាប់រង​អាយុ​ជីវិត​ជា​មួយ​ធនាគារ ស្ថាបនា ដោយ​ផ្តល់​នូវ​បទ​ពិសោធន៍​នៃ​ការ​ទូ​ទាត់​បុព្វ​លាភ​រ៉ាប់​រង​ដោយ​មិន​ប្រើ​សាច់​ប្រាក់​ដល់​ អតិថិជន​របស់​យើង​ទូ​ទាំង​ប្រទេស​ដែល​ចង់​បង់​ ឬ​បន្ត​បង់​បុព្វ​លាភ​រ៉ាប់​រង​របស់​ពួក​គាត់»។
លោក លីម អូន ប្រធាន​នាយក​ប្រតិបត្តិ​របស់​ធនាគារ ស្ថាបនា ក៏​បាន​មាន​ប្រសាសន៍​ដែរ​ថា៖ «ធនាគារ ស្ថាបនា ផ្តោត​សំខាន់​លើ ការ​លើក​កម្ពស់​ផ្នែក​ឌី​ជី​ថល​របស់​អតិថិជន​ដោយ​ផ្តល់​ជូន​ពួក​គាត់​នូវ​ជម្រើស​ដែល​មាន ភាព​ងាយ​ស្រួល រហ័ស និងសុវត្ថិភាព។   កិច្ច​សហការ​បន្ថែម ជា​មួយ​ ក្រុមហ៊ុន មេនូឡាយហ្វ៍ បង្ហាញ​ពី​ការ​ប្តេជ្ញា​ចិត្ត​របស់​យើង​ក្នុង​ការ​ពង្រីក​សេវា​កម្ម​ទូ​ទាត់​តាម​ប្រព័ន្ធ ឌីជីថល​របស់​យើង​តាម​រយៈ​កម្មវិធី​ទូរស័ព្ទ Sathapana Mobile ដែល​ផ្តល់​នូវ​បទ​ពិសោធន៍​កាន់​តែ​សម្បូរ​បែប​និង​កាន់​តែ​ប្រសើរ​ជូន​អតិថិជន​របស់​យើង»។
សម្រាប់​ព័ត៌មាន​បន្ថែម​អំពី​សេវាកម្ម​បង់​បុព្វ​លាភ​រ៉ាប់រង​នេះ លោក​អ្នក​អាច​ទាក់​ទង​មក​កាន់​ក្រុម​ហ៊ុន មេនូឡាយហ្វ៍ ខេមបូឌា តាមរយៈលេខទូរស័ព្ទ 1800-211-211 (ឥតគិតថ្លៃ) ឬធនាគារ សា្ថបនា តាម​រយៈ​លេខ​ទូរស័ព្ទ 023/081 999 010។

អំពីធនាគារ ស្ថាបនា
ធនាគារ ស្ថាបនា គឺជាធនាគាររពាណិជ្ជឈានមុខគេមួយនៅក្នុងប្រទេសកម្ពុជាដែលមានទ្រព្យសកម្មសរុបលើស ១.៦ ពាន់លានដុល្លារអាមេរិក និងមានបុគ្គលិកបម្រើការងារច្រើនជាង ៤០០០នាក់។ យើងមានបណ្តាញសាខាធំជាងគេទីពីរនៅក្នុងប្រទេសកម្ពុជាដែលមានសាខាច្រើនជាង ១៧០សាខា និង ម៉ាស៊ីន អេធីអឹម ច្រើនជាង២០០គ្រឿង ដែលមានសមត្ថភាពពេញលេញដូចជាដាក់ប្រាក់ ដកប្រាក់ និងធ្វើការទូទាត់ប្រាក់។ យើងផ្ដល់សេវាកម្មធនាគារពេញលេញដូចជាសេវាប្រាក់កម្ចី សេវាប្រាក់បញ្ញើ សេវា iBanking សេវាធនាគារតាមទូរស័ព្ទដៃ សេវាប័ណ្ណឥណពន្ធ និងប័ណ្ណឥណទានប្រភេទវីសា សេវាផ្ទេរប្រាក់ក្នុងស្រុកនិងក្រៅប្រទេស សេវាផ្ទេរប្រាក់ជុំវិញពិភពលោក Western Union ហិរញ្ញវត្ថុពាណិជ្ជកម្ម និងសេវាកម្មផ្សេងៗទៀតជាច្រើន។ ជាមួយគ្នានោះផងដែរ យើងបានសហការជាមួយក្រុមហ៊ុនទូទាត់តាមទូរស័ព្ទដៃជាច្រើនដូចជា វីង ផាយផេ ទ្រូម៉ាន់នី និង លី ហួរ វេរលុយ ដើម្បីផ្តល់ភាពងាយស្រួលដល់អតិថិជន។

អំពីក្រុមហ៊ុន មេនូឡាយហ្វ៍ ខេមបូឌា
ក្រុមហ៊ុន មេនូឡាយហ្វ៍ ខេមបូឌា បានចាប់ផ្តើមប្រតិបត្តិការរបស់ខ្លួននៅថ្ងៃទី 28 ខែមិថុនា ឆ្នាំ 2012 ។ ក្នុងនាមជាក្រុមហ៊ុន ធានារ៉ាប់រងអាយុជីវិតបរទេសដំបូងនៅក្នុងព្រះរាជាណាចក្រកម្ពុជា ក្រុមហ៊ុន មេនូឡាយហ្វ៍ ខេមបូឌា បានប្តេជ្ញាចិត្តក្នុងការផ្តល់ជូនអតិថិជនរបស់ខ្លួននូវផលិតផល និងសេវាកម្មការពារហិរញ្ញវត្ថុដែលជាតម្រូវការចាំបាច់របស់ពួកគាត់។ សម្រាប់ព័ត៌មានបន្ថែម សូមចូលទៅគេហទំព័រ www.manulife.com.kh ឬទំព័រ Facebook៖ ManulifeKh
ក្រុមហ៊ុន មេនូឡាយហ្វ៍ ហ្វាយនែនសល គឺជាក្រុមហ៊ុនផ្តល់សេវាកម្មហិរញ្ញវត្ថុឈានមុខគេមួយលំដាប់ថ្នាក់អន្តរជាតិដែលជួយប្រជាជនក្នុងការសម្រចចិត្តឲ្យកាន់តែមានភាពងាយស្រួល និងធ្វើឲ្យជីវិតកាន់តែប្រសើរឡើង។ យើងបានដំណើរការជា ក្រុមហ៊ុន John Hancock នៅសហរដ្ឋអាមេរិក និងជាក្រុមហ៊ុន មេនូឡាយហ្វ៍ នៅបណ្តាទីផ្សារផ្សេងៗទៀតក្នុងពិភពលោក។ យើងផ្តល់ការប្រឹក្សាហិរញ្ញវត្ថុ ដំណោះស្រាយធានារ៉ាប់រង ព្រមទាំងផលិតផល និងសេវាកម្មគ្រប់គ្រងទ្រព្យសម្បត្តិជូនដល់អតិថិជនជាលក្ខណៈបុគ្គល ជាក្រុម និងជាស្ថាប័ន។ គិតត្រឹមចុងឆ្នាំ 2018 យើងមានបុគ្គលិកបម្រើការងាជាង 34,000 នាក់ ភ្នាក់ងារធានារ៉ាប់រងប្រមាណ 82,000 នាក់ និងដៃគូចែកចាយផលិតផលធានារ៉ាប់រងអាយុជីវិតរាប់ពាន់ដៃគូផ្សេងទៀត ដែលកំពុងបម្រើសេវាកម្មជូនអតិថិជនប្រមាណ 28 លាននាក់។ គិតត្រឹមថ្ងៃទី 31 ខែកញ្ញា ឆ្នាំ 2019 យើងមានសាច់ប្រាក់ប្រតិបត្តិការចំនួន 1.2 ទ្រីលានដុល្លារកាណាដា ឬ 881 ពាន់លានដុល្លារអាមេរិកដែលជាទ្រព្យសកម្ម។ គិតត្រឹមរយៈពេល 12 ខែចុងក្រោយ យើងបានបង់ជូនជាអត្ថប្រយោជន៍ ការប្រាក់ និងការចំណាយផ្សេងៗជូនដល់អតិថិជនរបស់យើងដែលមានតម្លៃជាសាច់ប្រាក់ចំនួន 29.8 ពាន់លានដុល្លារ។ យើងមានប្រតិបត្តិការធំៗនៅអាស៊ី កាណាដា និងសហរដ្ឋអាមេរិក ហើយយើងបានបម្រើអតិថិជនរបស់យើងអស់រយៈពេលច្រើនជាង 100 ឆ្នាំ មកហើយ។ យើងមានស្នាក់ការកណ្តាលជាសកលរបស់យើងនៅទីក្រុង Toronto ប្រទេស កាណាដា ហើយក្រុមហ៊ុន មេនូឡាយហ្វ៍ Manulife Financial Corporation បានធ្វើប្រតិបត្តិការអាជីវកម្មជា MFC នៅទីផ្សារមូលប័ត្រ តូរ៉ុនតូ (TSX)ញូវយ៉ក(NYSE)  និងទីផ្សារមូលប័ត្រហ្វីលីពីន ហើយនៅលើទីផ្សារមូលប័ត្រហុងកុង(SEHK) ក្រោមឈ្មោះ 945។

Makes Your Life Better