ការចាប់ខ្លួនអតីតបុគ្គលិករបស់ធនាគារ ស្ថាបនា

អតីត​បុគ្គលិក​របស់​ធនាគារ​ ស្ថាបនា​ ឈ្មោះ​ អ៊ូ ​ចំរើន​ ត្រូវ​បាន​ចាប់​ខ្លួន​ និង​ចោទ​ប្រកាន់​ពី​បទ​រំលោភ​លើ​ទំនុក​ ចិត្ត​ពី​សំណាក់​លោក​ព្រះ​រាជ​អាជ្ញា​នៃ​អយ្យការ​អម​សាលា​ដំបូង​ខេត្ត​ឧត្តរ​មានជ័យ​ ហើយ​បច្ចុប្បន្ន​កំពុង​ត្រូវ​បាន​ឃុំខ្លួន​ជា​បណ្តោះ​អាសន្ន​ ដោយ​យោង​តាម​សារព័ត៌មាន​ក្នុង​ស្រុក​ដែល​ចុះ​នៅថ្ងៃ​ទី​១៨​ ខែ​ឧសភា​ ឆ្នាំ២០១៩ ។

តាម​រយៈ​ការ​ស៊ើប​អង្កេត​ផ្ទៃ​ក្នុង​របស់​ធនាគារ​ លោក​ អ៊ូ​ ចំរើន​ បាន​សារ​ភាព​ដោយ​ស្ម័គ្រ​ចិត្ត​ថា​ ខ្លួន​ពិត​ជា​បាន​ ប្រមូល​នូវ​ប្រាក់​សង​ត្រលប់​របស់​អតិថិជន​ចំនួន​ ០៧​ នាក់​ ដែល​សរុប​ជា​ទឹក​ប្រាក់​ចំនួន​ប្រមាណ​ ១២​ លាន​រៀល​ និង​ ដែល​លោក​មិន​បាន​ប្រគល់​ប្រាក់​នោះ​ទៅ​ឱ្យ​ធនាគារ​ឡើយ​ ដោយ​លោក​យក​ទៅ​លេង​ល្បែង​ស៊ីសង។ ធនាគារ​ ស្ថាបនា​ បាន​សម្រេច​ធ្វើ​ការ​បញ្ចប់​កិច្ច​សន្យា​ការងារ​របស់​លោក​ អ៊ូ​ ចំរើន​ ដែល​ជា​អតីត​ជំនួយ​ការ​គ្រប់​គ្រង​អតិថិជន​ ដោយ​មូល​ហេតុ​កំហុស​ធ្ងន់ធ្ងរ​ និង​បាន​ដាក់​ពាក្យ​បណ្តឹង​ផ្លូវ​ការ​ទៅ​អាជ្ញាធរ​មាន​សមត្ថកិច្ច​ ដើម្បី​ចាត់​វិធាន​ការ​ផ្លូវ​ច្បាប់​បន្ត។

ស្រប​ពេល​ជា​មួយ​គ្នា​នេះ​ដែរ​ ធនាគារ​ ស្ថាបនា​ ក៏​បាន​ជួប​ និង​ពន្យល់​ជូន​អតិថិ​ជន​ដែល​រង​គ្រោះ​ ដោយ​សារ​ទង្វើ​របស់​អតីត​បុគ្គលិក​រូប​នេះ​ នូវ​អង្គ​ហេតុ​ពិត​ប្រាកដ​ និង​វិធាន​ការ​ដែល​ធនាគារ​ ស្ថាបនា​ បាន​ និង​កំពុង​ចំណាត់​ការ​ ភ្លាម​ៗ​ផង​ដែរ។

ជា​ចុង​ក្រោយ​ ធនាគារ​ ស្ថាបនា​ សូម​ជម្រាប​ជូន​អតិថិ​ជន​ទាំង​អស់​មេត្តា​ជ្រាប​ថា​ ធនាគារ​យើង​ខ្ញុំ​ តែង​តែ​ចាត់​ វិធាន​ការ​តឹង​រ៉ឹង​បំផុត​ក្នុង​ការ​ពិនិត្យ​ និង​ស្រាវជ្រាវ​នូវ​ទង្វើ​មិន​ប្រក្រតី​ ក៏​ដូច​ជា​ការ​ពង្រឹង​នូវ​វិន័យ​របស់​បុគ្គលិក​ ដោយ​ ធនាគារ​មិន​មាន​ការ​លើក​លែង​ និង​យោគ​យល់​ជា​ដាច់​ខាត​ចំពោះ​បុគ្គលិក​ណា​មួយ​ដែល​ប្រព្រឹត្ត​កំហុស។

ដូច្នេះ​ ធនាគារ​ ស្ថាបនា​ សូម​ធ្វើ​ការ​ចែក​រំលែក​នូវ​ព័ត៌មាន​នេះ​ជូន​សាធារណៈជន​មេត្តាជ្រាប​ ក្នុង​ការ​ប្រុង​ប្រយ័ត្ន​ឱ្យ​បាន​ខ្ពស់​ ដើម្បី​ចៀស​វាង​ការ​ធ្វើ​ជា​ឈ្នាន់​របស់​បុគ្គល​ទុច្ចរិត​ណា​ម្នាក់​ ដែល​អាច​នឹង​ប្រើប្រាស់​មុខ​តំណែង​ជា​បុគ្គលិក​ធនាគារ​ក្នុង​ការ​ធ្វើ​ទង្វើ​ មិន​ប្រក្រតី​ណា​មួយ។  

ប្រសិន​បើ​អតិថិ​ជន​បាន​រក​ឃើញ​ ឬ​ ដឹង​អំពី​ការ​ប្រព្រឹត្ត​ខុស​ពី​សំណាក់​បុគ្គលិក​ណា​មួយ​ ធនាគារ​ ស្ថាបនា​ ស្នើ​សុំ​នូវ​ការ​ចូល​រួម​ពី​អតិថិ​ជន​ និង​លើក​ទឹក​ចិត្ត​ក្នុង​ការ​ផ្តល់​ព័ត៌មាន​ទាំង​នោះ​មក​កាន់​ធនាគារ​ តាម​រយៈ​ប្រព័ន្ធ​ ទូរស័ព្ទ​ +855 (0) 23/81 999 010 ៕